⁶Ovaṋingandu imba mbe nondjara nonyota yaimbi mbi ri ovisemba, Ndjambi tjinga ame ve kutisa nokuvekovisa okumana! (Mateus 5:6).

 

¹⁷“Amu tjangovasi ami mbe era okuisapo Omatwako wa Moses nomahongero wovaprofete. Ami hi ere okuyeisa po, nungwari mbe era okuyenenisa omahongero wawo. ¹⁸Tjiri, me mu raere, nga eyuru nehi tji vyaanda, kape nokaṋa nangarire kemwe okaṱiṱiṱiṱi kOmatwako ku make isiwa po, okutja avihe ngunda avi hiya yenenisiwa. ¹⁹Nu tjinangara pe nomundu ngu hi nokuṱakamisa etwako nangarire indi ehinanḓengu tjinene pomakwao, nu a hongo ovakwao okutjita nao, eye ma rire omuṱiṱi tjinene mouhona womayuru. Nungwari wina auhe ngu ma ṱakamisa Omatwako, nu a hongo ovakwao okutjita tjingetjo, eye ma rire omunene mouhona womayuru. ²⁰Ami me mu raere kutja tji mu he ri ovaṱakame tjinene okuyenenisa ombango ya Ndjambi okukapita ozonongo zomambo nOvafarisei, kamaamu hiti mouhona womayuru (Mateus 5: 17-20).

 

Outakame womundu otja kombeimbera, oviungura vya Mukuru oviyapuke mbya manuka nokuhina ozondataiziro, mongaro aihe, nomeritjindiro aehe, na membo arihe. Mu nao ozoveta za Muhona tji zaandjewa mombeimbera, ze handjaura ouyapuke nokuzikamisa otjisasaneke tji matji  sasaneke outakame woundu. ¹⁸Nungwari Muhona u tjevera avehe mbe nonḓuviro ku ye, avehe mbe nonḓakameno morusuvero rwe orukarerere. ¹⁹Eye u ve yama konḓiro,nu u ve hupisa mourumbu. ²⁰Eṱe twe riyameka ku Muhona; eye ondjamo nombatero yetu (Omapsalme 33:18-20).

 

¹⁹Omusemba nanda munu oviwonga ovingi, Muhona me mu vatere mu vyo avihe (Omapsalme 34:19). Outakame ovina ovipupu kovandu, posiya orondu tjiva kohorwa omauvi wavo i Jesus Kristus nOmbepo Ondjapuke tji mai tura mu vo.  Katu na omasa wokurira ovatakame mu ete oveni. ⁶Omuengeri we ndji raera kutja mbi yandje ombuze ya Muhona ndji ku Serubabel: “Ove mo toṋa, kanomasa wotjimbumba tjovita nu kanomasa woye omuini, nungwari mo toṋa nOmbepo yandje (Sakaria 4:6). Nungwari ovaKriste ombe na outakame wa Kristus, mena rokutja ²¹Kristus ke na pa tjitire ourunde, nungwari Ndjambi we mu tjita otja omurunde motjimbe tjetu, kokutja eṱe, moruwano na Kristus, tu sore okuisirwa i Ndjambi (2 Ovakorinte 5:21). Kotjikoroise Jesus wa pimbisa omauvi wetu koutakame we kokutja eyuva rimwe tji matu kakurama komurungu wa Muhona Eye ehe tu munu ondjo, posiya me tu mune ovatakame, ovayapuke mu Muhona Jesus. Ete twa tjitwa ovasemba komurungu wa Ndjambi; nu  twa yakurwa  otja ovatakame nu tu tjindwa otja ovatakame I Muhona mena routakame wa Kristus.  Eye wa tjitwa omurunde, ete twa tjitwa ovasemba. Kotjikoroise Jesus wa tjindwa otjomunandjo, ngunda a ri omuyapuke nu  omukohoke, ete twa tjindwa aayo owete ovasemba, ngunda atu ri ovarunde na twa zundaka.  Movina  Muhona Jesus ma pitira mena retu, tu tjindwa aayo twaenenisa omatwako wa Muhona, nu katu munine omberero kozondjo zetu. Ete twa yakura otjiyandjewa Tje otjihuze tjokurira ovasemba okuza ku Muhona wotjari nondjenda. Eye nga hivirikwe!

 

Nu wina matu yenene okumuna omatokero nomarorero. Matu sokukara kangi momatokero wetu a matu pewa omasa i Ombepo Ondjapuke. Ombepo  Ondjapuke I tu vatera kutja tu kare nomasa mongamburiro; Eye u tu vatera kutja tu yarise orusuvero rwa katjotjiri ku varwe nokutiza oundu  wetu nandarire kutja matu tatumisiwa, okukumininwa poo okuninikiziwa. ⁸Tu ṋiṋikiziwa mu avihe, nungwari katu pama omuinyo; rumwe tu kara mokuivaiva, nungwari katu yaraara; ⁹eṱe tu tatumisiwa, nungwari Ndjambi ke tu imbirahi; tu vandwa pehi, nungwari katu hahauka. ¹⁶Komuhingo mbwi opu tu ha zu okurihahiza. Nandarire kutja omasa wotutu twetu maye yanda, omuinyo wetu womoukoto mau yarurwa koupe eyuva arihe. ¹⁷Okumuna ouzeu kwetu kwanambano oko okupupu nu ku kapita tjimanga, nungwari oko ku tu ungurira ondjozikiro, ndji kapita avihe nu ndji karerera nga aruhe. (2 Ovakorinte 4:8-9 & 16-17).

 

Ozoveta kamaa ze tu yama ko. Nu ka ina pu ya memenwe kokutja I tu kuture. Oyo ya twaperwa kutja I tu hongorere nokuurika imbi mbi matu sokuisirwa. Kristus wa enenisa imbi oveta mbyaa I hepa kwete. Ete tu sokuyenda ku Ye kutja tu kuturwe. Kristus erike ma yenene okututjita ovasemba mu Muhona.  Okutja ete tu sokukara nonduviro ku Muhona otja kovinenge mbye tu tjitira.

 

²⁵“Omundu tje notjiposa na ove ne ku twara kotjombanguriro, rutenga zuvasaneye otjiposa hi ngunda ape noruveze nu ngunda au hiya ya kotjombanguriro, orondu tji mwa kavaza ngo eye me kekuyandja komupangure, nomupangure e ku yandja kovakarere wouhona, nowo ave ku patere motjovakamburwa. ²⁶Nu tjiri me ku raere, komoo piti mu yo nga tji wa sutu okamariva okasenina (Mateus 5:25-26).

 

¹Vanatje vandje, ami me mu tjangere omambo nga, kokutja amu ha tjiti ourunde; nungwari ngamwa ngu ma tjiti ourunde, eṱe tu nomuhungirirepo ku Tate. Eye oJesus Kristus, ingwi omusemba. ²Nu mu Kristus omuini eṱe omu tu isirwa ourunde wetu, nu kawo mbwi ourunde wetu porwe, nungwari wina owo mbwi ourunde wouye auhe (1 John 2:1-2).

 

Muhona omundu auhe me mu pangura nombanguriro osemba. Eye ma vere ovatjite wouvi na imba mbe tatumisa ovandu ve; imba mba suvera Muhona, mave munu otjisuta tjomwinyo waaruhe  moukarepo we.  Mena rokutja ovandu avehe ova Muhona, ngatu ise ombanguriro ya varwe kuye omuini. Ete katu sere okunyengwa poo okutonda imba mbu mave tu tatumisa. Tu sokutjiwa kutja matu ka karara neziriro komwano auhe mbu tu hupa pevapayuva.   Eye ma hana ovasemba ku na imba ovahasemba nu ma pangura ouye mowatjiri. Mba tona mokuhina okupangurwa nai mave ka pangurwa eyuva rombanguriro.  Muhona ma tirire omazenge we kombanda yovahasemba, mena rokutja o Muhona omupangure omusemba (lesa Omapsalme 18:20-27)

 

⁸“Nu otjiposa tji tji ri otjizeu kove okutjipangura, kutja otjokuzepa omundu poo otjousemba wouini poo otjokuhihamisa omundu korutu, okutja oviposa avihe movirongo vyoye, rirongera u yende poṋa Muhona, Ndjambi woye, pu me ritoororere (Deuteronomium 17:8). ⁸“Andakuzu owami ove, etje riyarikaṋa ku Ndjambi, ne yandja otjiposa tjandje ku ye (Job 5:8).

 

Eye omupangure wetu omusemba. Eye wetu suvera posiya matu sokuyaruka ombunda komahongero woutakame nousemba- ovyo oviyapuke nu kamaa vi hanewa kotjaritje nombanguriro. Ouyapuke we u munika mohoromende, nohoromende iri kovituve vye (Lesa e Jesaja 9 na Mateus 4). Muhona u na ozondando ozombwa nomakwizikiro kotjiwana, nungwari matu sokuhupa otja komirari vyouhona wa Ndjambi. Muhona u vanga okutusera ondaya ete atuhe, posiya ke na okusera ondaya kovisenginina mehi retu.​​​