¹ǃKhūb ge a ti ǃûi-ao tsî ta xū-i xare-e tôasi tama hâ. ²ǁÎb ge tita ǀgâxa ǃû-aidi ǃnâ ǁgoe kai tsî ǃnōsa ǁgamgu ǃoa ra ǂgaeǂgui. ³Ti ǀomsab ge ǁîba ra khoakhoa tsîb ra ǂhanu-aisib di daogu ai ǁîb di ǀons ǃaroma ǂgaeǂgui te. ⁴ǃGam ǃkhaenab ǃnâ ta ga ǃgû, xawe ta xū-i xare-e ǃao tide,  sats tita ǀkha hâ xui-ao. Sa ǁgâibasenhaib tsî sa ǃhôas tsîra ge ra ǁkhaeǂgao te. ⁵Sats ge ǂûǁaesa ra aiǂhomiba te, ti khākhoen hoan ra mûse; ǃgôahesa ǃhaokhoe-i asets ge tita ǃkhōǃoa tsî ti āǀgabisa ǂnâǂams nîs kōse ra ǀoaǀoa. ⁶ǃGâisib tsî ǀnammi âts ge tita nî hâǀkhā, ûi ta hâ ǁaeb hoaba tsî ta ge ti ûitsēdi hoade sa ommi ǃnâ nî ǁan  (Psalmdi 23:1-6 KKG20).

 

ǁÎb di ǃgâisib, ǂgaeǂguis tsî ǃûi-aosis tsîna da ge a ǂgomǃgâ ǁkhā, sada a sīǃnâ ǁkhās xa ǃnāsaseb sada nî dība ǃkhaisa. Elob ge daoba ra ǁguiba da ǁîb ǃnâ da kaise ǀgūgu, ǁgamǃnâhe ra, ǁnâǀnamxa ǃhûǁaresa ǁÎb ǀkha nî ūhâse, î da sada ǂûda tsî naun tsîna Psalmdi 23 di ûib ǃoa ǂgaeǂgui. ǁNān ǃKhūb a ǁîn di ǃûi-aon ge xū-e tôasi tama hâ. ǁÎb ge a Jehova-Jireh, ǃKhūb-Mā-Raba.

 

Jesub ge ǁÎb di ǁkhāǁkhāsabega aiǂhomibahesa ǂgansa ra ǁkhāǁkhā, tsî mâtikōseb Elob di huib ai ǃgâbasensa a ǂhâbasa mâ da ga ǀgore ǃnās hoasa ǃkhaisa. ¹¹Nētsē sida tsēkorobea pereba mā da, (Mateub 6:11 KKG20). ²⁵“ǁNā-amaga ta ra mîba go: Tā sago ûib tamas ka io tare-e go nî ǂû tamas ka io ās, tamas ka io sago sorodi, tamas ka io tare-e go nî anas tsîn xa ǂâiǂhansen. ǂÛ-i tsî saran tsîn ǀguin ai ǃgaoǃgaosa ûiba mâ harebe-e ūhâ? ²⁶ǀHomanirona kō re, ǁîn ge tsoro, ǃgao tsî ǃhorosâuǃnâ-ommi ǃnâ sâubasen tama hâ, xawen ge Elob xa ra ǂûmāhe. Sado kha nē ǀhomaniron xa ǃnāsase ǂhâǂhâsa tama hâ? (Mateub 6:25-26 KKG20). ⁶Tā xū-i xare-i xa ǂâiǂhansen, xawe hoan ǃnâ sadu di ǀgores tsî ǀkhomas ǀkha, Eloba ǂhâba du hâna ǂgan re, hoaǁae ganganxa ǂgaob ǀkha.¹⁹Ob ge ti Eloba mâ ǂhâsib sadu dib hoaba nî ǀoaǀoa, ǁîb di ǃkhūsib ǂkhaisib, Xristub Jesub ǃnâ hâba xu. (Philippians 4:6 & 19 KKG20).   ǂÛn tsî saran xa da ge ǂhansen tide, ǁGûb sada ǂhâsiga ǂan xui-ao. ǁÎb ge ǃgaeǀhaos di ǃhûǁaresa sada ǀkha ǂhâba hâ tsî ǁnās ge ǁÎba sada tsēkorobe ǂgaoǀkhādi ǃnâ dīǀoaǀoas ǃnâ ǂgomǃgâ tsî ǂguro ǁÎb gaosib tsî ǂhanu-aisiba ôas ǀkhasa.

 

¹⁴Xawe ǁnā-i, tita xa i ra māhe ǁgam-e ga ā-i ge tātsē ǁgâ tide, tsî ǁnā ǁgam-i tita ra ǁî-e mā i ge ǁî-i ǃnâ nî dâu ra ǀau kai, ǀamo ûib kōse.” (Johaneb4:14 KKG20)

 

Elob ge sada ǂhâsigu tsî ǂhâba da hâ xūn tsîn ǁaegu ǃkharagagusiba ra dī, tsîs ge Elobmîsa ǃkhūsiba ǀhaoǀhaos ǃoagu ra ǃkhâikhom da, xawe ra ǂgaoǂgaoǃnâ da gagasi ǃkhūsiba ôa-amsa. Nē ǃhūbaib ge sada ǁgâu tama hâ, tsî ǃâb ǂhâ da hâ xūn dib ge sada ǂâisa ǀamo ûib ǃoa ganupe da nē ûiba ūhâ hîa ǁnumisa. ²⁰ǁUiba ǀhommi ǃnâ ǀhaoǀhaobasen, ǁnāpab ge ǁgurib tsî ǀuriǀgūb tsîkha xa hapuhes tsî ǃnari-aogu xa ǃnarihesa xu a ǃnorasa.; ²¹Sadu ǁuib hâpa, ǁnāpab kom sadu ǂgaob tsîna hâo. (Mateub 6:20-21 KKG20).

 

²⁵Ob ge Petruba ge ǃeream “Ā, mā ra ǁgui-aide” ti. Petrub ge oms ǃnâ ǂgâ, ob ge Jesuba ǃhaedā bi tsî ge dî bi: “Simontse, mâtits satsa ra ǂâi? Tarina nē ǃhūbaib di gao-aoga ǁgui-aimarin tsî ǁgui-aidi tsîna ra māna? ǃHūǁîna tamas ka io ǃhaokhoena?”  ²⁶“Ob ge Petruba ge ǃeream “ǃHaokhoen” ti. Ob ge Jesuba ge mî: “Ā, o i kom ra ǂâibaseno ǃhūǁîn a ǃnorasa ǃkhaisa xū-e māsa xu. ²⁷“Xawe tā ge nēsa mâǃoa, hurirob ǃoa ǃgû, î ǁauǃkhō-ūdaba aoǂgā. ǂGuro ǁaub hîats ga ǃkhōb di amsats ga khowa, ots ge marisa nî hō, o ǁîs ǀkha hoakhom di ǁgui-aimarisa sī matare.(Mateub 17:25-27 KKG20). Mari-i ge a ǃhūbaib di, xawe ǀnaus ge a ǀhommi Gaosib di. 

​

ǃGāsa ǁgauǁgaudi hâ xawen ge ǀnî khoena noxopa mari-i ǃgâiaǂgaoba ra hā-ū ti ra ǂgom. ǃKhū hâ khoen ge ǃnāsa ǃkhūsiba ra tura tsî ǁnās ǀkha ǀams ai sī ra ǃkhom. Mâtits mari-e ǀnamsa xu a ǂgō ǁkhā? Paulub ge ǁgaraga ra mā da: (a) ǂanǃgâ re ǃkhūsib nî ǀguitsē bē ǃkhaisa, (b) ūts hâ-i ǀkha ǂâu re, (c) ǃûisen tare-e dīsats a māsenxa ǃkhaisa, mari-e ǃomǂgās ǃaroma, (d) khoen tsî Elob sîsenna mari-i ǃgâ-ai ǀnam tsî (e) naun ǀkha ǃnorasase ūts hâ-e ǀgoragu. ⁶Xawe ūts hâ xū-i ǀkhats ga ǂkhîǂâixa, os ge ama eloǃoabasa kai ǃgâiǃgâb ase nî ība tsi. ⁷Hoan ǃgâ-ai da nî ǂans ge, xū-i xare-i ose da ge nē ǃhūbaib ai hā khami da ǁōtsēs ai xū-i ose nî ǁarusa.  ⁸ǁNā-amaga a da ǂkhîǂâixa, ǂûn tsî saran hîa da ūhân ǀkha. ⁹Xawe ǃkhūsiba ra tura khoen ge ǂguiǃnâgu ǂgaeǂhapu-ain tsî gâre ǂkhôaǂkhôasa turagu xa ra ǃkhōhe, hîkākās kōse ǁîna ra sī-ūna. ¹⁰Mariǃgunuxasib ge a ǂkhaban hoan di ǃnoma, xui-aon ge ǀnî khoen ǁnāti īna ǂgoms âna xu ǁnāǁgôa tsî kai tsûba ge ǃaromabasen. ¹¹Xawe Timoteu, Elob khoetse, nē ǂkhaba xūn hoana ǂhāxū, îts ǂhanu tsî ǃgâin ǀguina dī. Eloǃaoǃgâxa ǀgaub ai ǂgoms, ǀnammi, mâǀgais tsî ǃnomsasib tsîn ǃnâ ûisa ǁgūba  (1 Timoteub 6:6-11 KKG20) .

ǃKhūsiba ǀhaoǀhaobasensa turas oses ge elosi ǂgaoǀkhāsa a mās di, ǃkhōǃoas ose. ⁶Tsî nēsa ǂâis ǃnâ ūhâ re: ǀOrose ra tsoro-i ge ǁkhāti ǀorose nî ǃgao tsî ǀoasase ra tsoro-i ge ǁkhāti ǀoasase nî ǃgao. ⁷A i mâ-i hoa-e ǂgaob ǃnâ i go ǀnai mîǀgui hâ i khami dī, māsenoǃnâsib tamas ka io ǁgarihes ǀkhas ose, Elob ǃgâiaǂgaoxa mā-aona a ǀnam amaga.⁸Tsî Elob ge a ǁkhā, sado ǂhâba du hâs xa ǃnāsase māsa. Hoaǁaeb ai du ǂâusase nî ūhâ tsî hoa ǃgâidīb ǃnâ ǃnāse  (2 Korinteǁîn 9:6-8 KKG20).

​

ǁKhāti da ge ra ǂgaoǂgaoǃnâhe, ǃgâi ǃnuriba da Elob ge mā dan xa nî mā ǃkhaisa. ǃereamsa ūhâ-i ge xū-i xare-e ūhâ tama hâ, xawe ǀgaib ǃharos ǃnâ, ǁî-i a ǀhonkhoe khami īse ǂnôa. Sada ǂâibasens tsî ǂgais ge Gaosib Elob dib di ǂnubikhâihesa marisise huiǃnâsa. Jesub ge ǁkhākhāsabegu âb ǃoa ge mî: “ǃKhū hâ khoeb ge mûǂamaoba ge ūhâ i. Tsîb ge mûǂamaoba ǁîb tawa mari-eb ra ǁgauoǃnâse hîǀhuru ti ge ǃnuriǃgâhe. ²Ob ge ǁîba ǂgai tsî ge mî: ‘Tare-e ta sats xa ra ǁnâu? Sa sîsenni di ǀoasa ǃnuriba mā te, sats ǃaruǀî ti mûǂamao ǁoa xuige.’ ³Mûǂamaob ge ǁîb ǃnâ ge ǂâi: ‘Tare-e ta nēsi nî dī; ti ǀhonkhoeb kom mûǂamaosisa xu ra ǃhae teo. ǃGom sîsen-e ta ge dī ǁoa tsî ǀkhopesa ta ge ra tao. ⁴Nēsi ta ge ǂan tare-e ta nî dīsa, mûǂamaosis di sîsenna xu ta ga ūǁnâheo, în khoena omdi ân ǃnâ ǁkhoreǁhare te ǁkhā.’ ⁵Ob ge ǀhonkhoeb âb di surude-aona ǀguiǀguibese ǂgaiǂgā tsî ǂguroba ge dî: ‘Mâtikōsets ti ǀhonkhoeba surude hâ?’ ⁶ǀGuikaidisi xapadi ǀkhera-oli-i’ tib ge ge ǃeream. Ob ge ǁîb ǃoa ge mî: ‘Sa surudeǂkhanisa ū, îts ǂnû tsî ǃhaese korodisi ti xoa.’ ⁷Tsîb ge ǁnās khaoǃgâ nauba ge dî: ‘Mâtikōsets surude hâ?’ Ob ge ge ǃeream: ‘Kaidisi ǁhōdi ǃhoro-i.’ Ob ge ǁîb ǃoa ge mî: ‘Sa surudeǂkhanisa ū, îts ǁkhaisadisi ti xoa.’ ⁸Gā-aiseb ge sîsen xui-aob ge ǀhonkhoeba nē ǀhôagao mûǂamaoba ge koa. Nē ǁaeǃgâs khoen ge ǃnāsase gā-aise ra sîsenūgu, ǃnâb ǃnâ hâ khoen ǃgâ-ai.” ⁹Tsîb ge Jesuba ǃaruǀî ge mî: “Mîba du ta ra, ǃhūbaib di ǀhôagao ǃkhūsib ǀkha khoexakhoena dībasen, î du nē ǃkhūsib ga toao, ǀamo ǁanǃkhaidi ǃnâ ǁkhoreǁharehe. ¹⁰ǂKhariron ǃnâ a ǂgomǂgomsa-i hoa-i ge ǁkhāti kai xūn tsîn ǃnâ a ǂgomǂgomsa; tsî ǂkhariron ǃnâ a ǀhôagao-i ge kain tsîn ǃnâ a ǀhôagao. ¹¹ǂHanuoǃnâ ǃkhūsib tsîn ǃnâ du ga ǂgomǂgomsa tama io, mâti du ama ǃkhūsib ǀkha nî ǂgomǃgâhe? ¹²Tsî ǀnî khoeb di xū-i ǀkhats ga ǂgomǂgomsa tama io, tari-e satsa xū-e nî mā, sa kai-i nîsets nî ūhâse?  ¹³“ǃGā-i xare-i ge ǀgam ǀhonkhoekha ǁkhā ǁaeb ai a ǃoaba ǁoa. ǀGuiba ǁkhan tsî-i ge nauba nî ǀnam tsî ǀguib ai ǂgāmâisen tsî nauba nî ǃharaxū. Elob tsî ǃkhūsib tsîkhats ge ǀgui ǁaeb ai a ǃoaba ǁoa” (Lukab 16:1-13 KKG20).

 

Elob ge Israelǁaesa amab tsî ǃgâiǃōsib di ǃurus ase ge ǁapoǁapo, hoaraga ǃhūbaib ǃoa. ǁÎb ǃhûǁares ǁÎb khoen ǃoagus ge ge ǀnammi xa ǀoa hâ, xawe ǁkhāti ǁaposa i. Elob ge ge ǁîn di ǃoaǃū hâ ǂgaeǂgui-ao i, ǂhanub, ǀhûhâsi ǂâiǂhansendi tsî ǀgoreǀîs ǃnâ. Israeli di ǀasase ge ǂnubihe ǁaes ge sada Elob ai da nî ǃgâsen ǃkhais di aiǁgaus ase ība. Mâǃoaxa da kas, ǁnâuǀnamxa da kas hoasab ge Eloba a hūs di ǃuru, ǀamo amab tsî ûib diba.

​

 ¹¹ǃKhūb Elob ge sore tsî a ǁkhaukhō, ǁÎb ge ǀkhommi tsî ǃgôasiba tsîkha ra mā.  Tsî ǁnān ǂnao-ose ra ûina xub ge ǃgâib âba ūdawa tama hâ  (Psalmdi 84:11 KKG20). Nē ǁaraǃās ge ra ǂâiǂâiǃnâ da ǁnāpa i ǃâ-i sada Eob di aiǂhomis ǃnâ ra ǀhuru-i, sada ûib ǃnâ ra ǂûtani-e hâ ǃkhaisa. ǂGōse da ge nî ǃgû.​​​