¹¹Ovakambure ovakwetu ve mu toṋa mena rombinḓu yOndjona na mena rOmbuze youatjiri ndji va hongonona; nowo va ri nombango okuyandja ominyo vyawo nokuṱira indji Ondjona. (Omavandururiro 12:11).  Ondiro ya ta kotjikoroise nu ai vasa pondondo ombe mouye oupe. Otjikoroise  tja paturura omuvero kondaarero na wina kouyere.  Kape na ondjira yarwe.  Otja tji  matu papitisiwa  oukoto mondiro Ye kotjikoroise opu matu yeruruka mombepo. 

 

Muhona Mukuru nge ku pe otjari tjokuzuva nokumuna otjirwa.  Otjirwa hi otjirarakaneno tjokuyenda komaandero  posiya Jesu otjirwa hi we tji taara rukuru kotjikoroise indu tjatja: “ tja tjitwa tja yenene”.  Omuinyo wa aruhe  wa  taurira moruveze rwetu nu oruveze karu tjipo rukwao. Muhona nge ku sere ondaya kutja u tjite  ondoororero osemba, momirari vyowatjiri mbi ri embo ra Muhona nokukotoka ku imbwi mbu ri owatjiri.

 

³¹Eyuru nehi mavi yanda, nungwari inga omambo wandje kamaaye yanda ko. ³²“Nungwari kape nomundu ngu ma tjiwa eyuva ndo na indji oiri, nangarire ovaengeri meyuru, nangarire ingwi Omuna; posi na Tate porwe ongumatjiwa. ³³Ṱakamiseye, kareye katumba, orondu eṋe kamu nokutjiwa kutja omayuva ngo maye ya ruṋe (Markus 13:31-33).

 

⁴⁰Neṋe wina otji mamu sokukara amwe rirongere, orondu Omuna wOmundu meya moiri eṋe ndji mu hinakumuundja” (Lukas 12:40).

 

²Ndjambi Tate na Kristus Jesus oMuhona wetu nge ku pe otjari nomutima omuwa nohange. ³Ami me tja okuhepa ku Ndjambi ngu mbi karera nomeritjiviro omakohoke otja ootate mukururume tjaave tjiti. Me mu tja okuhepa ami tji me ku zemburuka aruhe mozongumbiro zandje ouṱuku nomutenya. ⁴Ami me zemburuka omahoze woye nu me zeri okukumuna rukwao tjinene kokutja mbi urisiwe nenyando. ⁵Ami wina me zemburuka ongamburiro yoye onḓeu mu Ndjambi, indji ongamburiro nyoko mukurukaze Lois na nyoko Eunike ndji va ri na yo. Ami me tjiwa tjiri kutja ove wina u nongamburiro ndji. ⁶Ami opu me zu okukuzemburukisa kutja otjiyandjewa hi Ndjambi tje ku pa, indu tji mba yambekere omake kove, u tji yakisire ko. ⁷Orondu Ombepo Ndjambi ndje tu pa kai nokutumumaparisa; moruveze rwanao Ombepo ye mai tu urisa nomasa norusuvero nomeritjaerero. ⁸Nu vari o ṱohoṋi okuhongonona oMuhona wetu; nu o ṱohoṋi na ami ngu mba pandekerwa Kristus. Nungwari tjinda uri ondatumisire motjimbe tjOmbuze Ombwa. Ndjambi me ku pe omasa motjiṋa hi. ⁹Eye we tu yama nu we tu isanena okurira otjiwaṋa tje, nu e he ri mena rokutja eṱe twa ri noviungura oviwa, nungwari e ri mena rokutja a ri ombango ye omuini. Notjari tje eye we tu pa okuza korukuru mu Kristus Jesus. ¹⁰Nungwari nambano otjari hi tja vandururirwa eṱe momeero wOmuyame wetu Kristus Jesus. Eye wa yandekere ouvara wonḓiro, nu mOmbuze Ombwa eye wa munikisa omuinyo mbu ha yanda. ¹¹Ndjambi we ndji zika omuapostele nomuhonge wokuzuvarisa Ombuze Ombwa ndji, ¹²nami opu mbi zokutatumisirwa oviṋa mbi. Nungwari hi ṱohoṋi, tjinga ame tjiwa ingwi ami ku mbe riyameka. Nu me tjiwa, tjiri, kutja eye u nomasa okuṱakamisa nawa imbi mbya yandja ku ami nga kEyuva ndi eye ndi meya rukwao. ¹³Kakatera komambo wouatjiri ngu mbe ku honga otja otjihorera tji mo panḓere po. Nu kara mongamburiro na morusuvero ndu tu na rwo moruwano na Kristus Jesus. ¹⁴Ṱakamisa ouatjiri wembo mbu wa pewa. U ṱakamisa momasa wOmbepo Ondjapuke ndja tura mu eṱe (2 Timoteus 1:2-14).

 

¹Ami me ku rakiza oukukutu komurungu wa Ndjambi na Kristus Jesus ngu ma pangura ovanamuinyo novakoke, nu ngu meya okuyekuzika ouhona we, ²kutja u zuvarise Ombuze ya Ndjambi, u panḓere po, kutja oruveze ndu ri rwo poo ndu he ri rwo, u vyure ovandu, u ve vere nu u ve yanḓiparise tji mo hongo nomuretima auhe. ³Oruveze maru ya ovandu mu ve hi nokuzara omahongero omasemba, nungwari mu mave kongorere ozonḓero zawo oveni nokuripahera ovahonge mbu mave ve raere imbi mbi mave vanga tjinene okuzuva. ⁴Owo mave isa okupuratena kouatjiri nave yandja ombango kovimbaharere. ⁵Nungwari ove ritjaera omuini ku avihe mbi, tjinda ondatumisire, ungura oviungura vyoye otja omuzuvarise wOmbuze Ombwa nu u yenenise oviungura vyoye avihe otja omukarere wa Ndjambi. ⁶Nami, oiri ya yenene yokutja mbi punguhwe, noruveze orondwi rokutja ami mbi haṋike nomuinyo mbwi. ⁷Ami mba rwa otjirwa otjiwa okumana, mba toṋa motjikara tjotjirarakaneno, nu mba panḓera pongamburiro. ⁸Nambano pa sewa oruzenga rwondoṋeno ku ami, Muhona, omupangure omusemba, ndu me ndji pe meyuva ndi meya, nu kakutja oku ami porwandje, nungwari wina oku imba avehe mbe undja norusuvero inga omeero we (2 Timoteus 4:1-8).

 

Ami me mu minike mena ra Muhona Jesus Kristus.

 

Amen.​​​